दादा क दगड छूईं बात

दादा क दगड छूईं बात

दादा उमर मा द्वी साल बडु च और लंबै मा द्वी इंच छोटु। बेटा क परिवार तै मिलणौकु दिल्ली आयूं रै। बैठि गेवां। पुराण दिन याद ऐ गीन। दादा पुछणैं रै मी हाँ की ताल पर मुंडि हिलाणै रौं।

1. सुबेर सुबेर गौंखड्या स्कूल की उकाल् याद च?

2. भिंड्वडी और घुरसाण क ठंडु पानी याद च?

3. स्कूल म मास्टर जी न मुर्ग़ा बणै छे याद च?

4. बौडी क पुंगड क ककड़ी मुंगरी कि चोरी याद च?

5. और बौडी की गाली याद छन?

6. बाक्कि दद्दा और श्री राम बाडा, की डाँट याद च?

7. गर्म्यूं की छुट्टि माँ ह्यूंल नदी क माछ याद छन?

8. सागक डांड क बेडू तिमल कि याद च?

9. बरसाती छ्वाया और घट बणाणै की दौड़ याद च?

10. पूस की ठंड माँ खिलाण माँ जमी बर्फ़ कि चादर याद च?

11. छुट्ट्यूं माँ पगार लगाण, हल पकडनै की ज़िद , झिंकड लांदन याद च?

12. गैस क हांडी क उजाल मा रामलीला खेलण याद च?

13. बिना पोशाक बिना पौडर क एक्टिंग याद च?

14. बढिया एक्टिंग पर चवन्नी अठन्नी क इनाम याद च?

15. दस पाथ ग्यूं लेक गुदड घट म जाण और रात विताण याद च?

16. घट की गड़गड़ाहट, मांछ और ढुंगल क स्वाद याद च?

17. वापसी माँ उकाल् टपीक सारखाल कि ठंडी हवा याद च?

18. रस्ता मा सार गाँव वालू क बग़ीचा बिटीक कच्च आम चुराण याद च?

19. काका बाडौं क दगड खाबलि मा जाण याद च?

20. अष्टमी क दिन देवी क मेला, परसाद माँ मिठै याद च?

21. अचारी दास की ढोल रौंटि कि दिग्गादिगडी ठुम्माठुमडी याद च?

22. बराती बणीक परंदा, पठोला, कढथी वालु की मेहमानदारी याद च?

23. पुंगड मा पालथी मारीक, पातल मा दाल भात खाण याद च?

24. और चासणी बिटीक गरम गरम सूजी कु हलवा याद च?

25. लड़की वालु कि बरात्यूं त मिठ्ठि मिठ्ठि गाल्यूं की याद च?

26. रूंद रूंद हे दूदा बाबा, हे दूदा बोई बोलद ब्योंली क ड्वाला उठाण याद च?

27. देर रात गाँव पहुंचीक रात भर पांडव नाच याद च?

28. गिल्ली डंडा, हथगिंदी और गुत्थमगुत्था याद च ?

29. एक दिन मीन तेरी ठुकै कैरी छे याद च?

30. और जब तीन सूता तै घपकै छे याद च?

31. मकरसंक्रांति कु थलनदी कु गिंदी मेला याद च?

32. पुर्खों कि कूडि पाटिल याद च?

33. गाँव क घर खंद्वार ह्वे सकद याद च?

34. चाउमिन्न बर्गर खांद दफ़ा पलेयू और चून की रोट्टी याद च?

35. प्रवासी ह्वे गे त ठीक पर जड़ से जुड्यां रैणै की याद च?

तब बिटीक मी बकणै छों और तु बस गरदन हिलाणै रौ!