उत्तराखंड भ्रमण -२-किमसार
जब धर्मपत्नी तै ससुराल घुमाई त मायका
घुमाण त बणदी च. खास करिक जब वख छोटू भाई क ससुराल भी ह्वो। साथ साथ म्यार भी
ससुराल भ्रमण ह्वे जालु.. त तय ह्वे की किमसार क भी खड़ा खड़ी एक चक्कर लगाई औला.
बनचुरी से नालीखाल, लखवाड़, कस्याली,
भृगुखाल, कांडी ह्वे कण पंचूर का ऊपर से सड़क जांद.
पंचूर क नाम आई त आप तै पता ही च की उत्तर प्रदेश क मुख्य मंत्रीं योगी आदित्यनाथ
के जन्म स्थली च. बाकि डिटेल नेट पर छन. पांच टर्म एम् पी रेन पर कतयूं तै पता नई छे की उत्तराखंड क छन. जनि मुख्य
मंत्री बनीन सब गला लगानकुन लाइन पर लगी गीन. ये कुन बोल्दन सूर्योदय नमस्कार.
कांडी रोड डांड ही डांड ह्वे कण नीलकंठ
महादेव व्हेकन लक्ष्मण झूला क रस्ता ऋषिकेश मिल्द. नीलकंठ से पैली एक कच्चा रस्ता
बिदासनी जांद. एख बिटिक भी किमसार जाइ सक्दैन पर पूछन से पता चल की रस्ता कचु च ,
ऋषकेश से कौड़िया क रास्ता ठीक च. लगभग ११ बजे ऋषिकेश पहुंचवा, जल्दी जल्दी अस्नान ध्यान कर, आश्रम माँ भोजन कर
और लगभग १ बजे किमसार कुन रवाना। कौडिया
-तल्ला बाणास क रस्ता २-१/२ बजे किमसार.
मि त भाई की शादी बरसों पैली किमसार गे
छे. बचपन माँ एक बार गे छे जब धारकोट
ननिहाल ए छे. जाठि क परिवार किमसार माँ च. धर्म पत्नी जब पांच या छठी क्लास माँ छे
तब ऐ छे बल. जाहिर च वक न क्वि हम तै जनदु न हम कै तै. बस एक ही उम्मीद छे की
धर्मपत्नी क चचेरा भाई क परिवार माँ क्वी घर म
हवाल त ठीक वरना कुड देखिक ऐ जौला।
भाग्य से सभी घर म मिल गिन. पछाण भी गीन. सात साल पैली एक शादी माँ मेल
मिलाप ह्वे छे. बहुत प्यार से मिलीं. चाय पानी कर. रात रुकणो कु भी बोल पर समय कु
आभाव.
किमसार गांव बहुत रमणीक च. खुसी की बात च
की गांव वळवून मिलिक पाणिक समस्या हल कर
आली. सरकारी भरोसा पर नई राइ. आज हर घर म दिन माँ काम से कम आधा घंटा पाइप से पानी
पहुंचणै च. ये कार्य माँ सभी लोग कु
योगदान च पर हामार ससुरासी कंडवाल परिवार क विशेष सहयोग राइ. अगर गाओं क लोग आपस
माँ हाथ मिलायी क चली सकदन त कुछ भी असंभव नी च.
लोग यख भी काम ही छन पर पता
चल की अब लोग साल माँ एक बार त आयी जान्दन। घर भी रिपेयर करनाई छन. खेती बाड़ी बस घर क आस
पास सब्जी ऊगां तक सिमित च. तल्ला बाणास क पास एक सूंदर रिसोर्ट च. भविष्य माँ लोग
शादी व्याह शायद यखी कराल.
यख भी वी हाल. लड़का शादी कुन तैयार छन पर क्वि बेटियों तैं गांव
माँ नी विवाण चाँद. सब तै दिल्ली या देहरादून माँ योग्य वर चयोनाइ च.
क्या हॉल तब. ठीक ही ह्वाल।
No comments:
Post a Comment